Алматыдағы «Алатау» дәстүрлі өнер театрының алдындағы алаңда Қазақ мемлекеттік циркінің ұжымы 700 орындық көшпелі шапито шатырын тігіп, қала тұрғындарына «Наурыз шоу» бағдарламасын ұсынды, - деп хабарлайды aqshamnews.kz.
Көшпелі форматтағы цирк қойылымы алматылықтар мен қала қонақтарына ерекше эмоция сыйлап, мерекелік көңіл күйді арттыра түсті. Арнайы жабдықталған шатырда өткен бағдарлама дәстүрлі цирк өнерін жаңа қырынан танытып, көпшіліктің қызығушылығын оятты.
Шоу барысында акробаттар мен әуе гимнастары, жонглерлер мен эквилибристер, сондай-ақ көңілді сайқымазақтар өнер көрсетті.
«Бұл Қазақ мемлекеттік циркінің көшпелі кешені, яғни «шапито» форматы. Шатыр шамамен 700 көрерменге арналған», — деді Қазақ мемлекеттік циркінің директоры Мақсат Жайықов.
Оның айтуынша, ұсынылған бағдарламаны халықаралық деңгейдегі қойылым деуге болады. Оған ірі ареналарда өнер көрсетіп жүрген тәжірибелі шетелдік артистер де қатысуда.
«Бағдарламада цирк өнерінің әртүрлі жанрын қамтуға тырыстық: үйретілген иттердің өнері, акробатикалық нөмірлер, гимнастика, эквилибр, әуе гимнастарының қойылымдары. Сондай-ақ, көрермендер жонглерлердің өнерін тамашалай алады. Бұл нөмірлерді қала тұрғындары мен қонақтарына мерекелік сый ретінде дайындадық. Алдағы уақытта да балаларға қуаныш сыйлай береміз», — деді ол.
«Қызым екеуміз циркке алғаш келіп тұрмыз. Әсіресе, акробаттардың шеберлігі ерекше ұнады. Қызым қатты әсер алды. Жалпы бағдарлама балаларға ғана емес, ересектерге де қызықты. Барлығы жоғары деңгейде ұйымдастырылған», — деді қойылымға қызымен бірге келген Алматы тұрғыны Сәбира Құмғанбаева.
Айта кетейік, «Наурыз шоу» бағдарламасы көшпелі шапито форматында 21-25 наурыз аралығында өтеді.