Үкімет Мемлекет басшысының бастамасымен 2025 жылды Жұмысшы мамандықтары жылы деп жариялау аясында техникалық мамандарды қолдауға арналған жаңа шараларды жүзеге асыруда. Осыған орай, Отбасы Банкі «Наурыз жұмыскер» тұрғын үй бағдарламасын іске қосты. Бұл бағдарлама арқылы еліміздегі жұмысшы мамандық иелерінің баспана мәселесі шешімін табатын болады, деп хабарлайды aqshamnews.kz
«Наурыз жұмыскер» бағдарламасы өндіріс, энергетика, көлік, ауыл шаруашылығы және су ресурстары саласында жұмыс істейтін мамандарға арналған. Бұл бастама ауыр және жауапты еңбектің қоғам үшін маңыздылығын ескере отырып қабылданған.
- Несие көлемі: биыл 72 млрд теңге көлемінде қаражат бөлініп, 2 440 несие беріледі.
- Өтінімдер қабылдау мерзімі: 2025 жылдың 17 наурызы.
- Сыйақы мөлшерлемесі:
- Әлеуметтік осал топтар үшін – 7% (ЖТСМ 7,1%-дан 9,6%-ға дейін).
- Басқа санаттар үшін – 9% (ЖТСМ 9,4%-дан 13%-ға дейін).
- Бастапқы жарна:
- Таза әрлеудегі жаңа тұрғын үй үшін – 10%.
- Әрленбеген жаңа үй немесе қайталама нарықтағы үй үшін – 20%.
- Несиенің ең жоғары сомасы:
- Облыстар үшін – 30 млн теңге.
- Астана мен Алматы қалалары үшін – 36 млн теңге.
«Наурыз жұмыскер» бағдарламасымен қатар, Отбасы банкі отандық кәсіпорындармен бірлесіп «корпоративтік» өнімді іске қосады. Бұл механизм арқылы кәсіпорындар өз қызметкерлеріне несие беру үшін арнайы қаражат бөледі.
«Отбасы банкі» АҚ Басқарма төрағасы Ләззат Ибрагимова жұмысшы мамандардың ел үшін маңыздылығын атап өтті:
«Металлургтер, кеншілер, электриктер, тас қалаушылар және басқа да ауыр жұмыс атқаратын мамандар біздің негізгі қажеттіліктерімізді қамтамасыз етіп отыр. Олардың баспана мәселесін шешу – қиын еңбек жағдайларының орнын толтыру үшін жасалған маңызды қадам».
«Наурыз жұмыскер» тұрғын үй бағдарламасы арқылы жұмысшы мамандық иелеріне мемлекет тарапынан қолдау көрсетіліп, олардың өмір сапасын арттыруға жағдай жасалады. Бұл бастама елдегі әлеуметтік әділеттілікті нығайтып, еңбек адамдарының беделін көтеруге үлкен үлес қосады.