2020 жылы шегілмейтін темекі бұйымдарын әкелуге, өндіруге, сатуға және таратуға толық тыйым салынды.
Насыбай сатқандар бес жылға дейін бас бостандығынан айырылуы мүмкін, деп хабарлайды Almaty-akshamy.kz
«Насыбайды тұтынудың адам ағзасына тигізетін кері әсерін ескере отырып, 2020 жылы шегілмейтін темекі бұйымдарын, оның ішінде насыбайды әкелуге, өндіруге, сатуға және таратуға толық тыйым салынды («Халық денсаулығы және денсаулық сақтау туралы» кодексінің 110-бабының 9-тармағы)», - деді Қазақстан Республикасы премьер-министрінің орынбасары Тамара Дүйсенова.
Оның мәлімдеуінше, бұл норманы бұзғаны үшін 25 айлық есептік көрсеткіш мөлшерінде әкімшілік айыппұл қарастырылған («Әкімшілік құқық бұзушылық туралы» кодекстің 196-бабы).
«Алайда насыбайды заңсыз сату және тарату бойынша жауапкершілікті қатайту мақсатында «Денсаулық сақтау саласындағы кейбір заңнамалық актілерге өзгерістер мен толықтырулар енгізу туралы» парламент қабылдаған заңда шегілмейтін темекі бұйымдарын әкелу, өндіру, сату және тарату үшін қылмыстық жауапкершілік көзделді (сату және тарату үшін – 200 АЕК мөлшерінде айыппұл салу немесе 200 сағатқа дейін қоғамдық жұмыстарға тарту, не 50 тәулікке дейін қамауға алу; әкелу, өндіру үшін – 2000 АЕК-ке дейінгі мөлшерде айыппұл салуға, не 600 сағатқа дейінгі мерзімге қоғамдық жұмыстарға тартуға, не екі жылға дейінгі мерзімге бас бостандығын шектеуге, не сол мерзімге бас бостандығынан айырумен немесе онсыз мүлкін тәркілеу)», - деп хабарлады үкімет басшысының орынбасары.
Дүйсенова бiрнеше рет немесе аса iрi мөлшерде табыс алумен байланысты қылмыстық топ жасаса – 5000 АЕК дейiнгi мөлшерде айыппұл салуға не 1200 сағатқа дейiнгi мерзiмге қоғамдық жұмысқа тартуға не мүлкі тәркіленіп бес жылға дейінгі мерзімге немесе сол мерзімге бас бостандығынан айыруға жазаланатынын айтты.
Вице-премьер заңға енгізілген нормаларды халық арасында түсіндіру бойынша тиісті профилактикалық іс-шаралар өткізіліп жатқанын ескертті.