Алматыдағы "Динамо" стадионында нашақорлыққа қарсы жарнамаларды жою мақсатында "Нашақорлыққа жол жоқ" атты кең ауқымды жалпықалалық науқан ұйымдастырылды.
Шараның мақсаты – қоғамның назарын есірткі жарнамасының таралу мәселесіне аудару, азаматтық белсенді ұстанымды қалыптастыру және жастарды қала кеңістігін есірткі айналымын насихаттайтын жазбалар мен интернет-сілтемелерден тазарту ісіне жұмылдыру.
- Есірткі жарнамасы – бұл тәуелділікке апарар алғашқы қадам. Ол қылмысқа итермелейді және адам өмірін бұзады. Сондықтан әрбір алматылық мұндай жазбаларды көрсе бейжай қарамай, хабар беруі маңызды. Бұл – қаланың қауіпсіздігіне қосқан жеке үлес. Алматы есірткі мен оның насихатынан азат қала болуы тиіс. Ал бұл нәтижеге тек полиция мен тұрғындар бірлесе әрекет еткенде ғана қол жеткізуге болады, – деді Алматы қаласы полиция департаментінің есірткі қылмысына қарсы күрес басқармасының бастығы Мұрат Жұмабаев.
Науқанға қатысушылар қала аудандарына бөлініп, қабырғалар, қоршаулар мен жерасты өткелдеріндегі мессенджер нөмірлері мен есірткі сатуға қатысты ақпарат тарататын интернет-сілтемелер жазылған жазбаларды өшіру жұмыстарын жүргізді. Жалпы науқанға мыңға жуық адам – студенттер, еріктілер мен қоғамдық ұйым өкілдері қатысты. Бірлескен жұмыстың нәтижесінде екі мыңнан астам есірткі жарнамасы жойылып, олардың барлығы бұғаттау үшін уәкілетті органдарға жолданды.