Қазақстанда мүмкіндігі шектеулі жандардың жұмысқа орналасуы қоғам үшін маңызды тақырыптардың бірі. Өмірдегі түрлі қиындықтарға қарамастан, еңбекке деген ынта мен талпыныс ешқандай шектеуге мойынсұнбайтынын дәлелдеген жандар бар. Солардың бірі – Марина Шапошникова.
Марина бірінші топтағы мүгедек. Ол көру қабілетінен айырылғанына қарамастан, білім алуға және өз орнын табуға деген ұмтылысын ешқашан жоғалтпаған. Политехникалық колледжді және Басқару институтын қызыл дипломмен аяқтап, мамандығын жетік меңгерген. Бұған дейін бухгалтер болып жұмыс істеген. Алайда көру қабілетін жоғалтқан соң, ұзақ уақыт бойы жұмыс табу қиынға соқты.
Қазір Марина арнайы кітапханада жұмыс істейді. Ол бұл жерде тек еңбек етіп қана қоймай, өзі секілді жандармен байланыс орнатып, жаңа достар тапты.
"Маған кітапханада жұмыс істеген ұнайды. Мұнда мен өзіме жақын орта таптым. Жұмысым қызықты, адамдармен араласамын. Әрине, кейде жалақы жеткіліксіз болып жатады. Бірақ ең бастысы – өзіме ұнайтын іспен айналысу. Мен үшін еңбек ету тек табыс көзі емес, өмірге деген құлшыныс", - дейді Марина Шапошникова
Марина мүмкіндігі шектеулі жандардың жұмысқа орналасу мәселесінде басты рөлді мемлекет пен қоғамның қолдауы атқаратынына сенімді. Арнайы бағдарламалар мен мүмкіндіктер көбейсе, мыңдаған адам өз орнын табатыны анық.
Марина сияқты жандардың оқиғалары – өмірдің кез келген қиындығын еңсеруге болатынын көрсететін үлгі. Еңбек етуге деген ынта мен талпыныс ешқашан жоғалмаса, әрдайым жаңа мүмкіндіктерге жол ашылады. Жанашырлық пен қолдау көрсетілген қоғамда барлығының өз орнын табатыны сөзсіз.