Алматының Медеу ауданы әкімдігі адам қарасы қалың Пушкин аллеясында бос жұмыс орындары мен кәсіптік бағдар беру жәрмеңкесін ұйымдастырды., – деп хабарлайды aqshamnews.kz тілшісі.
Мақсат - халықтың жұмыспен қамтылуына дәнекер болу, мегаполистегі жұмыссыздық деңгейін төмендету және азаматтарға жаңа кәсіби мүмкіндіктер ұсыну.
Жәрмеңке сағат 11-де басталады деп көрсетілгенімен, одан ерте келіп алғандар көп болыпты.
“Бізге отыздан астам адам келді жұмыс сұрап. Есепші, архивариус мамандығын және көгалдандыру қызметі мен аула сыпырушы жұмысын сұрағандар көбірек. Жастардың біразының дипломы жоқ екен, сонда да жұмыс табу көзі, кәсіптік білім алу мүмкіндігі туралы жол көрсеттік. Жасы елуден асқан тұрғындар да еңбек нарығындағы мамандықтарға қызығушылық танытуда”, - дейді “Бөбек” Ұлттық ғылыми-практикалық, білім беру және сауықтыру орталығының менеджері Ғалия Аханова.
Ұйымдастырушылардың айтуынша, жәрмеңке жастарға, оқу бітіруші түлектерге және жұмыс іздеп жүрген азаматтарға бағытталған маңызды алаң болды.
“Жәрмеңкенің артықшылығы - бір жерде бірнеше мекеменің ұсынысымен танысып, тікелей сұхбаттасуға мүмкіндік бар. Бұл жұмыс іздеушілер үшін өте қолайлы формат. Біз жылда өткіземіз осындай жәрмеңкелерді. Нәтиже бар. Әсіресе, жастар көп келеді. Бүгінгі іс-шараға 40-қа жуық жұмыс беруші мекеме-компания, сондай-ақ мегаполистегі жоғары оқу орындары мен колледждің өкілдері қатысты”, - дейді Медеу аудандық жұмыспен қамту және әлеуметтік бағдарламалар бөлімінің басшысы Бауыржан Үшкемпіров.
Сонымен қатар ашық аспан астында ұйымдастырылған жәрмеңкеде мектеп оқушыларына сұранысқа ие мамандықтар мен болашақ оқу бағыттары бойынша кәсіптік бағдар беретін консультациялар ұйымдастырылды.
Нұржамал ӘЛІШ