23 наурызда Алматыдағы перзентханалардың бірінде 34 аптада сирек кездесетін туа біткен патологиямен ұл бала дүниеге келді. Сәбидің мойнының оң жақ жартысында үлкен кистозды лимфангиомасы болған. Онымен қоса тыныс алу және жүрек-қан тамырлары жеткіліксіздігі де ісіктің асқынуына себеп болған.
Нәрестенің салмағы 3844 г, бойы 46 см болып туылды. Баланы емхананың неонатологиялық бригадасы кесар тілігінен кейін бірден жасанды тыныс алу аппаратына қосып, Алматы қаласының Балаларға жедел медициналық көмек көрсету орталығына жеткізді.
Бала өте ауыр жағдайда келіп түсті. Өмір сүру көрсеткіштері бақылауға алынып, шұғыл көмекті талап етті. Ультрадыбыстық зерттеу деректері бойынша, құрсақішілік кезеңде өлшемі 12 см-ге жуық түзіліс бар деген диагноз қойылған. Ол дегеніміз босану кезіндегі ерекше акушерлік және хирургиялық тәсілді қажет етеді деген сөз.
24 наурызда балалар жедел жәрдем бөлімінің дәрігерлері ісік тәрізді түзіліске пункция жасап, 500 мл-ден астам сұйықтықты алып тастады. Бұл тұншығу қаупін азайтуға көмектесті. Баланың жағдайын бөлім меңгерушісі Ұлықпан Болатбекұлы Әлсейітов бақылауға алды. Сәбиді Балаларға шұғыл медициналық көмек көрсету орталығының жаңа туған нәрестелер жансақтау бөліміне жатқызып, ота жасауға дайындады.
26 наурызда лимфангиоманы түбегейлі алып тастау операциясы жасалды. Операцияны балалар хирургі Мырзахмет Саматбек Әбділманапұлы мен ассистент Күниязов Жалғас Қайырбекұлы эндотрахеальді анестезиямен жасады. Неонатолог, хирург және анестезиологтардың үйлесімді жұмысының арқасында ота сәтті өтті.
Бала тағы үш апта бойы жансақтау бөлімінде дәрігерлердің бақылауында болды. Кейін қанағаттанарлық жағдайда үйге шығарылды.
Алматы қаласының Балаларға жедел медициналық көмек көрсету орталығының ұжымы үшін бұл күрделі туа біткен патологиясы бар жаңа туған нәрестенің өмірі үшін күрестегі кезекті жеңісі. Операциядан кейін тігістер жазылып, уақыт өте келе мүлдем көрінбейтін болады. Ал бала құрдастарымен бірдей өсіп, дамиды.