Талап қойылды, жұмыс жүргізіліп жатыр.
Мобильдік сервистер мен қосымшаларды қазақ тілінде қызмет көрсетуге мәжбүрлейміз. Бұл туралы ҚР Цифрлық даму, инновациялар және аэроғарыш өнеркәсібі министрі Бағдат Мусин айтты, деп хабарлайды Almaty-akshamy.kz ҚазАқпаратқа сілтеме жасап.
«Бұған бұрын мән бермеуші едік. Тек қана мемлекеттік органдардың сайттарына, порталдарына назар аударып келдік. Оларды мәжбүрлеп, қазақша аударттық. Бірақ, олардың да сапасы аздап төмен екенін білеміз. Қазір жақсартып жатырмыз. Оларға талап қойылды, жұмыс жүргізіліп жатыр.
Мұнда жекеменшік сервистердің, Facebook-тің қазақшасы неге жоқ деген сұрақ туындайды ғой. Бірақ оны біз қалай қазақша жасай аламыз? Ол – нарық. Facebook өзі жасамаса, біз жасай алмаймыз ғой. Оны мәжбүрлесек, қазақша жоқ деп жауып тастасақ, адамдар шулай бастайды. Сондықтан осы сатыда қазір Америкаға бармай-ақ қояйық, жанымыздағы сервистер – 2ГИС, Яндекс болсын, соларға шығып, осындай талаптарды қойып жатырмыз.
«Біздің экономикада жұмыс істегіңіз келсе, онда қазақ тілін енгіз» деген талап қоямыз. Сондай ұсыныстарды талқылаудамыз», - деді министр Ақтөбе облысы жұртшылығымен кездесу барысында.
Оның атап өтуінше, мұндай талапты заңға енгізу де қажет.
«Бұл - күрделі мәселе. Бірақ, оны біртіндеп енгіземіз», - деді Бағдат Мусин.