Қазақстан Ауыл шаруашылығы министрлігі елден қой мен ешкіні сыртқа шығаруға қойылған шектеулерді ұзартатын бұйрық жобасын әзірледі, деп хабарлайды Aqshamnews.kz тілшісі «Ашық НҚА» порталына сілтеме жасап.
Жобаға сәйкес, сандық шектеулер (квоталар) Еуразиялық экономикалық одақ елдеріне де, үшінші мемлекеттерге де қолданылмақ. Құжатта Қазақстан аумағынан тірі қой‑ешкіні, соның ішінде 4 айдан асқан қозыларды 120 мың басқа дейін экспорттауға 6 ай мерзімге квота енгізу қарастырылған.
Министрлік бұл шара отандық тауар өндірушілердің мүдделерін қорғауға және өңдеуге қажетті шикізаттың тұрақты жеткізілімін қамтамасыз етуге бағытталғанын түсіндірді. Түсіндірме жазбада құжаттың мақсаты - елдің азық‑түлік қауіпсіздігін нығайту және отандық өңдеу кәсіпорындарының жүктемесін арттыру екені атап өтілген.