Қазақстанның денсаулық сақтау министрі Ақмарал Әлназарова ана өлімінің алдын алу мақсатында контрацептивтер сатып алуға жергілікті бюджеттен қаржы бөлу қажет екенін айтты, деп хабарлайды Аqshamnews.kz. Бұл туралы ол Үкімет отырысында мәлімдеді.
Министр қазіргі қолданылып жатқан шараларға қарамастан, еліміздің алты өңірінде ана өлімінің көрсеткіші өсіп отырғанын атап өтті. Оның ішінде ең күрделі жағдай Ақмола облысында тіркелген – бұл аймақтағы көрсеткіш республикалық деңгейден жеті есе жоғары.
"Ана өлімінің негізгі себептері – ауыр экстрагениталды аурулар (55%) және акушерлік факторлар (45%)", – деді Әлназарова.
Министр осы қауіптердің алдын алу үшін бірнеше ұсыныс жасады. Ол әкімдіктерге медицина қызметкерлерін жұмысқа тарту, олардың біліктілігін жүйелі түрде арттыру және ауруханалардың материалдық-техникалық жағдайын жақсарту үшін қаржы бөлуді ұсынды.
Сонымен қатар, Әлназарова өңірлік биліктен жүкті әйелдер мен балаларды облыс орталықтарындағы медициналық мекемелерге жеткізуге арналған көлікпен қамтамасыз етуді, сондай-ақ бала туу жасындағы әлеуметтік осал топтағы әйелдерге контрацептивтер ұсынуға бюджеттен қаражат қарастыруды сұрады.