Құрылғы доға тәрізді пішінге ие.
WindowsUnited неміс басылымының мәліметінше, Microsoft корпорациясы жиналмалы компьютер тінтуірін шығарады, деп хабарлайды Almaty-akshamy.kz Lenta.ru сайтына сілтеме жасап.
Америкалық корпорацияның патентінде құрылғы болашақтың тінтуірі ретінде сипатталған. Құрылғы доға тәрізді пішінге ие және алғашқы нұсқасы 2008 жылы шыққан Arc тінтуіріне ұқсайды. Аксессуардың кіріктірілген топсасы бар, оның арқасында оны оңай алып жүру үшін бүктеуге болады.
Журналистер бұл тінтуірді қазір танымал бола бастаған жиналмалы смартфондармен салыстырды. Құрылғының құжаттамасында оның айналдыру дөңгелегі болатын-болмайтыны көрсетілмеген. Журналистердің болжауынша, Microsoft корпорациясы компьютерлік тышқандардың осы бір классикалық элементінен бас тартуы мүмкін. Патент 2021 жылдың наурызында берілді және 4 қарашада жарияланды. Осыдан кейін авторлар аксессуар жақын арада шығарылуы мүмкін деген қорытындыға келіп отыр.
2020 жылдың тамыз айының басында АҚШ-та 92 жастағы алғашқы компьютерлік тінтуірді жасаушылардың бірі Уильям Инглиш қайтыс болды. Ол 1964 жылы Дуглас Энгельбартпен бірлесе жұмыс істеп, компьютерлік тінтуірдің үлгісін жасаған болатын.