Бұдан былай ән мәтінінде зорлық-зомбылыққа немесе алып қашуға шақыратын сөздері бар туындының авторы тексеріледі. Ішкі істер министрлігі ондай әндердің әрқайсына құқық тұрғысынан баға беруге дайын, - деп хабарлайды aqshamnews.kz тілшісі.
"Менің ойымша, бұл әндердің мазмұнында, яғни сөздерінде зорлық-зомбылыққа немесе қандай да бір теріс әрекетке үндейтін шақыру болса, біз оны міндетті түрде қарастырамыз, мониторинг жасап, реакция білдіруіміз керек", - дейді ішкі істер министрі Ержан Сәденов.
Ішкі істер министрінің айтуынша, ән мәтінінде "алып кашам", күштеп сүйем", "еріксіз әкетемін" сияқты сөздері болса, онда заң алдында жауап береді. Бұл - жай сөз емес, қылмыстық құқықбұзушылық әрекетіне насихат.
Сондықтан қоғам санасына кері әсер ететін осы мәселеге бейжай қарауға болмайды. Қазір осындай контентке мониторинг жүргізіліп жатыр. Заң бұзу анықталған жағдайда, ән авторы мен продюсері де жазаға тартылады.