Қырғызстанда мемлекеттік тілді қолдануға қатысты заң жобасы қабылданды, деп хабарлайды aqshamnews.kz
Жогорку Кенештің отырысында депутаттар мемлекеттік тілді қолдану мәселелері бойынша кейбір заңнамалық актілерге өзгерістер енгізу туралы заң жобалары пакетін екінші және үшінші оқылымда қабылдады.
Түзетулерге сәйкес, Жогорку Кенеш депутаттары, министрлер кабинеті төрағасы мен оның мүшелері, Конституциялық, Жоғарғы және жергілікті соттардың судьялары, прокурорлар, тергеушілер міндетті түрде қырғыз тілін білуі тиіс. Бұл талап ұлттық банк қызметкерлеріне, құқық қорғау және ұлттық қауіпсіздік органдары қызметкерлеріне де қатысты.
Адвокаттар мен нотариустар да қырғыз тілін жеткілікті деңгейде меңгермесе, лицензия ала алмайды.
Қырғызстандағы мемлекеттік тіл туралы заң талаптарын бұзғаны немесе орындамағаны үшін жеке тұлғаларға 5 мың сом (шамамен 29 675 теңге), заңды тұлғаларға 17 мың сом (шамамен 100 895 теңге) көлемінде айыппұл салынады. Бұл норма жеке тұлғаларға қатысты нормативтік құқықтық актілерде белгіленген тіл білу талаптарына қолданылмайды.