Алматы қаласындағы №92 лицейде Қазақстан Республикасы Мемлекеттік қызмет істері агенттігінің Алматы қаласы бойынша департаменті жанындағы Мемлекеттік қызметтерді көрсету мәселелері жөніндегі ведомствоаралық жұмыс тобының кезекті отырысы өтті.
Жиынға департамент басшысы Шынарай Әлімхан бастаған ВАЖТ мүшелері, Алматы қаласы Білім басқармасының орта және қосымша білім беру бөлімінің басшысы Ақмарал Айтуарова және 8 ауданның білім мекемелерінің өкілдері қатысты.
Отырыстың күн тәртібінде Алматы қаласы Білім басқармасында жүргізілген жоспарлы тексеру нәтижелері мен білім беру ұйымдарына оқуға қабылдау бойынша мемлекеттік қызмет көрсету барысы қаралды. Жұмыс тобы білім басқармасының есептерімен танысып, алдағы маусым айында 1-сыныпқа құжат қабылдау мәселелерін жан-жақты саралады. Осы ретте Ақмарал Төлегенқызы ата-аналарға қажетті ақпараттарды қамтитын мазмұнды слайд көрсетілім ұсынып, қабылдау тәртібін егжей-тегжейлі түсіндірді.
Отырыс барысында мемлекеттік қызмет көрсету сапасын арттыру, халыққа түсіндіру жұмыстарын күшейту, сондай-ақ мүгедектігі бар азаматтарға қолайлы жағдай жасау, инклюзивті білім беруге бейімделген мекемелердің санын арттыру секілді маңызды ұсыныстар айтылды. Сонымен қатар, қамқоршылыққа байланысты бірқатар мәселелер көтеріліп, қатысушылар өз пікірлерін ортаға салды. Ведомствоаралық жұмыс тобы барлық ұсыныстарды назарға алып, болашақта жүзеге асыру үшін нақты шаралар қабылданатынын жеткізді.
Жиын қорытындысы бойынша білім беру саласындағы мемлекеттік қызметтердің ашықтығын, қолжетімділігін және тиімділігін арттыру бағытында жұмысты жалғастыру міндеті қойылды. Бұл бағыттағы үйлесімді шаралар алдағы уақытта қала тұрғындарының мемлекеттік қызметтерді алу процесін айтарлықтай жеңілдетуге ықпал етпек.