Әбікен Әбілұлының жарқын бейнесі жүректерде мәңгі сақталады, деп хабарлайды aqshamnews.kz тілшісі.
Қазақстан жұртшылығы ауыр және орны толмас қазаға ұшырады. Көрнекті ғалым, педагог, қоғам қайраткері, Мемлекеттік және жергілікті басқару институтының ректоры Әбікен Әбілұлы Тоқтыбеков өмірден озды.
Әбікен Әбілұлының бүкіл кәсіби өмірі Отанға қалтқысыз қызмет етумен тығыз байланысты болды. Ол саналы ғұмырын мемлекеттік қызметшілерді, мәслихат депутаттарын, әкімдер мен басқару буынының мамандарын даярлауға және олардың біліктілігін арттыруға арнады. Жоғары кәсібилігі, терең білімі, ұстанымдылығы мен өз ісіне деген ерекше адалдығының арқасында Қазақстан Республикасының мемлекеттік басқару жүйесінің қалыптасуы мен дамуына елеулі үлес қосқан мыңдаған жоғары білікті мамандар даярланды.
Әбікен Әбілұлы республикалық кәсіби «Мәслихат және Әкімдік» журналының бастауында тұрып, көп жылдар бойы оның тұрақты бас редакторы болды. Бұл басылым озық тәжірибе алмасудың, мемлекеттік және жергілікті басқарудың, жергілікті өзін-өзі басқаруды дамытудың және еліміздің заңнамасын жетілдірудің өзекті мәселелерін талқылаудың беделді алаңына айналды.
Ол өз қызметінде жастарға патриоттық тәрбие беруге ерекше мән берді. Оның бастамасымен және тікелей қатысуымен Алматы қаласында «Жас ұрпақ» ақпараттық-білім беру патриоттық орталығы құрылды, оның басты миссиясы тарихи жадыны сақтау және Қазақстанның көрнекті мемлекеттік қайраткерлерінің мұрасын дәріптеу болды. Орталық қызметі аясында Жұмабек Тәшеновке, Жұмабай Шаяхметовке, Өзбекәлі Жәнібековке, Нағашыбай Шайкеновке және Кәкімбек Салықовқа арналған маңызды еске алу іс-шаралары ұйымдастырылды. Алда әлі талай игі жоспарлар мен бастамалар бар еді, бірақ, өкінішке орай, олардың орындалуы маңдайға жазылмады.
Қазақстан жоғары білімді ғалымынан, дарынды ұйымдастырушысынан, дана ұстазынан және өз елінің нағыз патриотынан айырылды. Оның өмір жолы, ұзақ жылғы кәсіби қызметі мен адами асыл қасиеттері Отанға адал, жанқиярлықпен және қалтқысыз қызмет етудің әрқашан лайықты үлгісі болып қала береді.
Әбікен Әбілұлының отбасы мен жақындарына қайғыра көңіл айтамын.
Әбікен Әбілұлы Тоқтыбековтің жарқын бейнесі оның туған-туыстарының, достарының, әріптестерінің, шәкірттерінің және оны танып-білген, қатар жұмыс істеген барша жандардың жүрегінде мәңгі сақталады.
Марқұмның иманы жолдас, жаны жәннатта болсын!
Бахтияр Камалов, Қазақстан Республикасы мемлекеттік қызметінің ардагері