Өңірлік коммуникациялар қызметінің алаңында Қазақстан Республикасы Конституциясының 30 жылдығына арналған брифинг болып өтті. Пресс-конференцияның спикері – Алматы қаласы Азаматтық альянсының төрағасы, қалалық қоғамдық кеңестің мүшесі Қайыржан Әбдіхалыков. Ол азаматтарды конституциялық міндетін ұмытпауға шақырып, елдің Негізгі Заңының тұрақтылығы мен өзектілігін атап өтті.
"30 жыл ішінде біз Қазақстан Республикасының Конституциясы – тұрақты әрі өміршең құжат екеніне көз жеткіздік. Ол елмен бірге дамып, ішкі және сыртқы сын-қатерлерге жауап беріп келеді. Конституция – бұл жай ғана ереженің жиынтығы емес. Бұл – билік тармақтарының мәртебесінен бастап, әр азаматтың құқығы мен міндетіне дейінгі үлкен жүйе. Ол біздің демократияға, адамгершілік пен әлеуметтік әділдікке негізделген мемлекет ретіндегі болмысымыз. Реформалардың нәтижесінде азаматтарды мемлекетті басқаруға қатыстыратын жаңа тетіктер енгізілді. Ашықтық, жариялылық, биліктің есеп беруі – бұл құр ұран емес, бүгінде нақты жұмыс істеп тұрған қағидалар. Конституция бізге құқық берумен қатар, міндет те жүктейді. Мемлекеттің игілігін көріп, осы елде өмір сүріп жатсақ, Конституцияда көрсетілген міндеттерімізді де орындауға тиіспіз", – деді Қайыржан Әбдіхалыков.
Спикердің айтуынша, Конституция – заңнамалық жүйенің іргетасы ғана емес, сонымен қатар азаматтар мен мемлекеттік институттардың өмір сүру қағидаттарын айқындайтын маңызды құжат. Қазіргі уақытта барлық министрлер мен жергілікті атқарушы органдардың басшылары халық алдында есеп беруге міндетті. Мұндай өзгеріс конституциялық нормалардың арқасында іске асып отыр.
Брифинг барысында соңғы жылдағы реформаларға, әсіресе 2022 жылғы маусымда өткен референдумнан кейін енгізілген өзгерістерге айырықша назар аударылды. Сонымен қатар, Қайыржан Әбдіхалыков азаматтық қоғамды дамытудың маңызына тоқталып, мемлекеттік бағдарламалар мен бюджет шығынын бақылауда қоғамға кең мүмкіндік беретін Қоғамдық бақылау туралы заңның қабылданғанына алғыс білдірді. «Бұл – шын мәнінде революциялық қадам. Ол Конституцияның халық үшін жазылғанын, адам мүддесін бірінші орынға қоятын қағидаларға негізделгенін көрсетеді», – деген спикер, Конституция ресми мемлекеттік рәміз болмаса да, қоғамдық сананың ерекше нысаны ретінде қабылданатынын, әрі мемлекет пен қоғамның дамуындағы басты бағдардың бірі болуы тиіс екенін еске салды.