9 мамырда Қазақстан президенті Қасым-Жомарт Тоқаев қазақстандықтарды Жеңіс күнімен құттықтады, деп хабарлайды Aqshamnews.kz тілшісі Ақордаға сілтеме жасап.
Мемлекет басшысы құттықтау сөзінде аталмыш датаның үлкен қайғы-қасіретпен жеткенін еске салды.
"Сіздерді Ұлы Жеңістің 80 жылдығымен шын жүректен құттықтаймын. Осы мерейлі күнді еліміздің әрбір азаматы ерекше көңіл-күймен қарсы алып, Жеңімпаз аға буынға шексіз ризашылығын білдіреді. Фашизмге қарсы сұрапыл соғыс халқымызға орасан зор қайғы-қасірет әкелді. Біздің қаһарман жауынгерлеріміз асқан ерлік пен батылдық танытып, азаттық пен әділдік жолында аянбай күресті. Жүз мыңдаған сарбазымыз ұрыс даласында қаза тапты. Тылдағы жұрт та адам айтқысыз қиындыққа қарамастан тынымсыз тер төгіп, Жеңісті жақындатуға өлшеусіз үлес қосты. Олар егіс алқабында, зауыттар мен фабрикаларда күн-түн демей жұмыс істеп, майданды қамтамасыз етті" деді Президент.
Сондай-ақ ол ардагерлерге қолдау көрсету керектігін, олардың ерлігі мәңгі ұмытылмайтынын тілге тиек етті.
"Біз отандастарымыздың қайтпас қайсарлығы мен қажырлы еңбегін ешқашан ұмытпаймыз. Жанқиярлық пен ерліктің озық үлгісін көрсеткен батырларымыздың есімін әрдайым ұлықтаймыз. Ардагерлерімізге қамқорлық жасап, қолдау білдіреміз" деді ол.
Елімізде 500-ге жуық көше Жеңіс қаһармандарының құрметіне аталатын болады. Бұл туралы Қасым-Жомарт Тоқаев құттықтау сөзінде айтты.
"Қазақстанда Жеңіс күніне орай көптеген іс-шара өткізіліп жатыр. Еліміз бойынша бес жүзге жуық көшені қаһарман ерлеріміздің атымен атау туралы шешім қабылданды. Ауқымды әскери шеру өтті. Мұның бәрі зұлмат соғыстың зардабын халқымыз ешқашан жадынан шығармауы үшін қажет" деді ол.
Сонымен қатар мемлекет басшысы бүгінгі датаның маңызын, құндылығын ерекше атап өтті.
"Біз Жеңіс күнінде бейбіт өмірдің қадірін ұғынып, достық пен тыныштықтың маңыздылығын терең түсінеміз. Осы мызғымас құндылықтар әрдайым халқымыздың әл-ауқатын арттырудың және Қазақстанды тұрақты дамытудың берік негізі болып қала береді. Мен бұған кәміл сенемін. Қадірлі ардагерлерімізге және барша отандастарымызға зор денсаулық, бақ-береке тілеймін!" деп түйіндеді құттықтау сөзін Президент.