Енді балаларға түскі асты үйінен алып келуге болады
Осыған байланысты Елордадағы білім ошақтары тоңазтқыш, жылытқыш сынды құрылғылармен жабдықталып жатыр. Жаңа ережеге барлық мектептер бейімделіп үлгерді ме?
Саида 8 сыныпта оқиды. Бес жыл бойы гимнастикамен және бимен айналысып жүр. Салауатты өмір салтын ұстанып, дұрыс тамақтануды қолға алған. Оқушының түскі ас мәзіріне тек қайнатылған тағамдар, көкөніс, жеміс және ақуыз кіреді. Мектепке үйден әкелетін тамаққа шектеу жоқ. Балалардың түскі асы тексерілмейді. Себебі оны ата-аналар оқушының талғамына сай салып береді.
- Бұл бастама негізінен денсаулығына байланысты белгілі бір диетаны қажет ететін балаларға арналған. Әлемнің көптеген елдерінде балалар мектепке түскі асты үйінен алып келеді. Осыған байланысты біз мектептегі түскі ас мәселесіне өзгеріс енгіздік. Енді оқушылар өздерінің тамақтарын асханада отырып ішуге құқылы, - дейді ҚР Оқу-ағарту министрлігі Балаларды әлеуметтік-құқықтық қорғау басқармасының басшысы Дана Мақтаева.
Көп ұзамай елдегі мектептердің барлығы жаңа ережеге бейімделеді. Асханалар да жұмысын жалғастыра береді. Сондықтан балаға түскі ас беру немесе түскі астың ақшасын беруді ата-ананың өзі шешеді.