Сондықтан оларға жұмыс барысында жылдам реакция, ұқыптылық, ізгілік, ұйымшылдық, стресске төзімділік сияқты дағдылар мен жеке қасиеттер ауадай қажет.
Кардиология және ішкі аурулар ҒЗИ басқарма төрағасы Марат Пашимовтың айтуынша, дәрігердің жұмысын мейіргерсіз елестету қиын. Олардың мойнында – дәрігердің барлық тағайындауын қатаң орындау, пациенттерге күтім жасау және оларға білікті көмек көрсету. Олардың пациенттерді емдеудегі рөлі де аса зор.
«Мейіргерлер үнемі білімін жетілдіріп отыруы керек. Жаңа білімді игере отырып, олар өз жұмыстарын сапалы әрі тиімді орындай алады. Біз жыл сайын мейіргерлерімізді оқуға жібереміз. Мысалы, биыл ғана кардиохирургия бөлімшесінің аға мейіргері, операциялық мейіргер және анестезист мейіргер жақын және алыс шетелдердің жетекші медициналық орталықтарымен ынтымақтастық аясында Каунас қаласындағы Литва денсаулық ғылымдары университетінің ауруханасында тағылымдамадан өтті. Басқалары Астана қаласындағы Ұлттық ғылыми кардиохирургиялық орталықта LVAD кейін пациенттерді операциядан кейінгі бақылау, ҚДСЖМ Қазақстан медицина университетінде қазіргі жағдайда мейірбике ісін ұйымдастыру бойынша білімдерін жетілдірді», – дейді Кардиология және ішкі аурулар ҒЗИ басқарма төрағасы Марат Пашимов.
Ынтымақтастық туралы меморандум шеңберінде ҒЗИ үшін «Сунчонхян» университеттік медициналық орталығымен (Оңтүстік Корея, Пучон қ.), National Hospital Organization Nagasaki Medical Cеnter, Пиза университетінің дипломнан кейінгі білім беру кардиология институтымен (Италия) және басқа да әлемдік орталықтармен медицина қызметкерлері үшін кәсіби тағылымдамалар ұйымдастыру, мамандардың біліктілігін арттыру туралы келісімге қол жеткізілді.
Нәтижесінде қаншама мейірбикенің кәсіби шеберлігі, мейірімді жүрегінің арқасында талай адам ауруынан сауығып, отбасына оралуда. Осы орайда Марат Орынбасарұлы бүгінгі мерекеде Айдана Сыздықова (кардиология бөлімшесі), Адилям Мусаева (қабылдау бөлімшесі), Оксана Лакисова (реанимация бөлімшесі), Халмурат Сыдықов (сәулелік диагностика бөлімшесі), Гүлбану Әбдал (кардиохирургия бөлімшесінің операциялық мейіргері) сынды абыройлы әріптестерін ерекеше атап өтті. Мейіргер мамандығы әрдайым трендте.