Алматыдағы Құрылтай сайлауында 90 жастағы Сақыпжамал Райымбекқызы дауыс беріп, ел азаматтарын белсенді өмір сүруге шақырды, – деп хабарлайды aqshamnews.kz тілшісі.
Естеріңізде болса, жақында ақ жаулықты ана Медеудегі 842 баспалдақты бағындырып, көпшілікті тәнті еткен еді. Өмір бойы еңбекпен шыңдалған кейуананың айтуынша, тауға шығу оның көптен бергі арманы болған.
«Жүрегім де қысылмады, аяқ-қолым да тартылмады. Жоғарыдағы дәмханаға бір-ақ бардым», - дейді Сақыпжамал Райымбекқызы.
Кейуана ұзақ жыл қой бағып, шопан болған. Немерелеріне тауға шыққысы келетінін айтқан соң, балалары арманын орындап, Медеуге алып барған. Осылайша, 90 жастағы ана 842 баспалдақты оңай еңсеріп, Медеудің жоғары бөлігіне дейін көтерілген.
Бүгін ол Құрылтай сайлауына арнайы келіп, таңдау жасады.
«Бүгін Құрылтай сайлауына келіп, дауыс бергеніме қуаныштымын. Мереке құтты болсын! Мен шыққан тауға сендер де шығыңдар!», - деп батасын берді ақ жаулықты ана.
Сайлауға Сақыпжамал Райымбекқызын қызы Нұргүлсім Молдахметова ертіп келген.
«Сайланған депутаттар Қазақстанымызды қорғайтын, қолдайтын ел азаматтары боларына сенеміз», - деді ол.