Алматы қаласының Медеу ауданында 2023 жылдың соңына дейін медициналық қызмет көрсетуді жақсарту және кеңейту мақсатында төрт денсаулық сақтау нысанының жобалық-сметалық құжаттамасын аяқтау көзделген, деп хабарлады аудан әкімі Еркебұлан Оразалин ӨКҚ брифингінде.
«Думан» шағын ауданында 500 адам қабылдайтын жаңа емхана салу, «Алатау» шағын ауданында мемлекеттік емхана ғимаратын сейсмикалық күшейтумен қайта жаңарту, №2 қалалық мамандандырылған балалар үйін күрделі жөндеу (Байжанов көшесі, 107/5), №4 жедел жәрдем қосалқы станциясының ғимаратын салу («Самал-3» ш/а) жоспарланған. №2 қалалық мамандандырылған балалар үйін күрделі жөндеуді қаңтар айында бастау жоспарлануда, қалған үш жоба бойынша құрылыс-монтаждау жұмыстары 2024 жылдың 2 тоқсанында басталады.