Парламент Сенатының Төрағасы Мәулен Әшімбаев бастаған Атом электр стансасын салуды қолдау жөніндегі Халықтық штаб Алматы облысына жұмыс сапарымен келді.
Штаб құрамына депутаттар, сарапшылар және қоғам қайраткерлері кіріп, өңірдегі кәсіпорын ұжымдарымен, кәсіпкерлермен және жергілікті тұрғындармен кездесті. Кездесулердің басты мақсаты — Қазақстанда АЭС салуға қатысты референдум өткізу мәселесін талқылау.
Мәулен Әшімбаев кездесуде Мемлекет басшысы Қасым-Жомарт Тоқаевтың АЭС салу жөніндегі жалпыұлттық референдум өткізу бастамасының маңыздылығын атап өтті.
«Бүгін біз осында Президентіміз Қасым-Жомарт Кемелұлы Тоқаевтың бастамасымен елімізде АЭС салу мәселесі бойынша республикалық референдум өткізу мәселесін талқылау үшін келдік. Бұл маңызды қадам — "Халық үніне құлақ асатын мемлекет" тұжырымдамасының нақты көрінісі. Осы референдум арқылы біз қоғамның пікірін ескеріп, елдің болашағына қатысты шешім қабылдайтын боламыз. АЭС салу Қазақстанның энергетикалық тәуелсіздігін нығайтуға, экологиялық таза энергия өндіруге және экономикалық өсімге жол ашады. Сондықтан қазақстандықтардың бұл бастаманы қолдайтынына сенімім мол», – деді Мәулен Әшімбаев.
Кездесуде АЭС құрылысының елдің энергетикалық тұрақтылығын арттырып, инвестиция тартуға және жаңа жұмыс орындарын ашуға ықпал ететіні айтылды. Сондай-ақ, халықтың белсенді қатысуы және референдум арқылы өз пікірін білдіруі елдің болашағы үшін маңызды шешім екені атап өтілді.