1 маусым – Халықаралық балаларды қорғау күні қарсаңында Алматы қаласы мәслихатының депутаты Айгүл Шалбаева мегаполистегі «Сенім» әлеуметтік қызмет орталығының балаларын мерекемен құттықтап барды.
Құр қол бармай, мәслихаттың және Amanat партияcының атынан, орталықтың оңалту бөлмесіне балаларға лайықтап жасалған құрғақ бассейн сыйлады. 
«Сенім» әлеуметтік қызмет орталығы денсаулығында кінәраты бар, арнаулы әлеуметтік қызметтер көрсетуге мұқтаж 3-18 жас аралығындағы 109 бала тәрбиеленіп жатқан медициналық-әлеуметтік мекеме. Оларға стационар жағдайында да қызмет көрсетіледі, яғни балалар «Сенімнің» қарауында күндіз болады, ал ата-аналары бұл кезде алаңсыз жұмысында жүреді. Бұл да болса мемлекет тарапынан жасалып отырған үлкен қолдау. Өкінішке қарай, мұнда ата-анасының қамқорлығынсыз қалған өрендер де бар. Олардың басым көпшілігі церебралды сал ауруына, «Даун» синдромына, аутизмге шалдыққан балалар.
Балалардың ата-аналары мен орталық өкілдері Amanat тарапынан көрсетілген қолдауы үшін халық қалаулысы Айгүл Дүйсенқызына алғыстарын білдірді.