Бұқар жырау ауданы, Мұстафин атындағы ауылының әкімі Қайрат Құсайынов көлікті мас күйінде басқарғаны үшін ұсталды.
Оқиға 3 ақпанға қараған түні ауылішілік жолдардың бірінде болған. Ер адамнан алкогольдің иісін сезген полицейлер оны сараптамаға жіберген. Нәтижесінде орташа дәрежедегі мас болу фактісі анықталған, деп хабарлайды аlmaty-akshamy.kz.
Әкімшілік сот әкімді жеті жылға көлік жүргізу құқығынан айырып, 15 тәулікке қамауға алды.
Бір қызығы, бұған дейін де Қайрат Құсайынов мас күйінде көлікті жүргізіп бара жатқан жерінен ұсталған болатын. Бұл оқиға 2018 жылдың 25 тамызында орын алған еді. Сөйтіп, үш жылға көлік жүргізу құқығынан айырылған болатын. Одан кейін Қайрат Құсайынов сол Бұқар жырау ауданына қарасты Қушоқы ауылының әкімі болды.
Бірақ араға екі жыл салып, құқығынан айырылған әкім қайтадан полицейлердің қолына түсті. Бұл жолы оның қолында көлік жүргізу куәлігі жоқ болатын.
Әкім мемлекеттік қызметшілердің Әдеп жөніндегі кеңесіне шақырылды. Кеңес кезінде Қайрат Құсайынов өзін генералдың тапсырмасын орындайтын жауынгерге теңеді. Кез келген уақытта берілген тапсырманы бұлжытпай орындауға даяр екенін айтып ақталды. Ел-ішіндегі коронавирустық жағдайға байланысты әкім қызметтік көлікпен ауданды аралап, халыққа көмек жасап жүргенін алға тартты. Сол кезде ел ішіндегі жағдайды ескерген билік органдары әкімге ескерту берумен шектелген еді. Ал енді бұл жолы Қайрат Құсайыновтың мемлекеттік қызметкер ретіндегі тағдыры түрмеден жазасын өтеп шыққан соң белгілі болмақ.