Алматы қаласы Жастар саясаты басқармасы және Есірткі қылмысына қарсы күрес басқармасы, Алматы қаласының полиция департаменті қолдауымен, Алматы қаласы Жастар саясатын дамыту мемлекеттік қоры және «Динамо» дене шынықтыру және спорт қоғамы ұйымдастыруымен, «Динамо» стадионында балаларды қорғау күніне және нашақорлықпен күрес айлығына арналған Алматы қаласының демалыс орталықтарының тәрбиеленушілері мен «Динамо» дене шынықтыру және спорт қоғамының балалары арасында «Марафон Жас Динамо» - «RÝH - MARAFON» спорттық ойын-сауық мерекесі өтті, деп хабарлайды Almaty-akshamy.kz.
Бұл спартакиаданың негізгі мақсаты - демалыс орталықтарының жасөспірімдері мен жастары арасында салауатты өмір салтын насихаттау, оларды дене шынықтырумен және спортпен жүйелі түрде айналысуға тарту, сондай-ақ мықты спортшылар мен командаларды анықтау.
Шара салтанатты шерумен басталды, оған барлық қонақтар мен спортшылар қатысты. Ауқымды іс-шара бірнеше бөлімнен тұрды: концерттік бағдарлама, жүгіру турнирі, спорттың әртүрлі түрлері бойынша шеберлік сыныптары аймағы, мысалы: эстафета, дартс, АКМ құрастыру-бөлшектеу, арқан тартыс, асық ойыны және т.б.
Жарыс басталмас бұрын қатысушыларға ережелер түсіндіріліп, командаларға бөлінді. Әр топ 600 және 800 метрге жүгірді. Жеңіл атлетиканың кәсіби төрешілері әрбір қатысушының жарыс уақытын жазып, қорытындылау хаттамасына енгізді. Жеңімпаздар мен жүлдегерлер кубоктар, медальдар, мақтау қағаздары және сыйлықтармен марапатталды. Жарыс таза ауада санитарлық нормалар мен әлеуметтік қашықтықты сақтай отырып өткізілді.
Спартакиаданың ашылуының басты ерекшелігі спартакиадаға қатысушыларды қолдаған «DIEGO» тотемдік аң барысы болды. Ол спортшыларды қиындықтарды жеңуге және алға қойған мақсаттарына жетуге жігерлендіретін күш пен жеңіске деген ұмтылыстың символына айналды.
Балаларды қорғау күніне орай жас спортшыларға «Tas group» ұсынған балмұздақ ұсынылды.
«Біз салауатты өмір салты үшін» ұранымен: шағын футбол, боулинг, үстел теннисі және стритбол сияқты спорт түрлерінен спартакиада аясындағы барлық турнирлер маусым айының соңына дейін кезең-кезеңімен, нашақорлықтың алдын алу және оған қарсы күрес айлығы аясында өткізілетін болады.