Қуаңшылық зардабын тартқан малшылардың тізімі жасалып жатыр
Қазір аймақта мал басы қайта саналып, тіркеуге алына бастады. Жергілікті әкімдіктер тізімге енген шаруа қожалықтарының мәселесін шешуге көмектеседі, деп хабарлайды almaty-akshamy.kz
Өңірде маусым айында 631 мың 179 түлік болған. Соның 460 мыңға жуығы аналық мал. Биылғы жазда 1 мыңнан астам ірі қара далада қырылды. Әсіресе, Онды, Мырзайыр, Басқұдық, Ұштаған, Жарма, Сазды ауылы маңындағы шаруашылықтарда жылқы шығыны болды.
Мал санағы аяқталған соң, шаруаның жем-шөпке жұмсаған шығынын ішінара өтеу үшін аналық малға қаржы беріледі. Мемлекет қазынасынан 1,9 млрд теңге бөлінді. Ешкі мен қойдың жасы 12, сиыр 18, түйе-жылқы 36 айға толуы керек.
Қысқы мал азығы қорын жасауға аймақ бюджетінен 5,3 млрд теңге қарастырылды. Оның 1,9 млрд теңгесі шөп, қалған 3,4 млрд қаражат жем сатып алуға жұмсалады.