Маңғыстау облысында Бейнеу – Боранқұл тасжолында йогурт тиелген жүк көлігі аударылып қалды. Оқиға орнынан түсірілген видео әлеуметтік желіде тарап, жұрт назарын аудартты, деп хабарлайды AqshamNews.kz тілшісі.
Ақпаратқа сәйкес, жүк көлігі Боранқұл ауылы маңындағы 64-разъезд аумағында жолдың көктайғақ болуына байланысты аударылған. Куәгерлердің айтуынша, жүргізуші жағдайды жергілікті тұрғындарға жеткізуді сұрап, шашылып қалған өнімді тегін тарата бастаған.
Маңғыстау облыстық полиция департаменті жол-көлік оқиғасын растады. Ведомствоның мәліметінше, апат 7 желтоқсанда сағат 14:20 шамасында болған. Тіркемесі бар Scania жүк көлігінің жүргізушісі тайғақ жолда рульге ие бола алмай, соның салдарынан көлік аударылып кеткен.
Полиция хабарлауынша, оқиға салдарынан ешкім зардап шеккен жоқ. Алайда жүргізушіге ӘҚБтК-нің 610-бабы бойынша әкімшілік хаттама толтырылып, 20 АЕК көлемінде, яғни 78 640 теңге айыппұл салынған.
Сонымен қатар тараған мәліметтерге қарағанда, шашылған «Нежный» маркалы йогурттарды тұрғындарға тарату шешімі жүргізуші мен жүк иесі арасында келісілген болуы мүмкін. Өнім тез бұзылатын санатқа жататындықтан, қаптамалардың бір бөлігі зақымданып, сақтау мерзімі шектеулі екені де айтылды.
Полиция департаменті жүргізушілерді қыс мезгілінде, әсіресе көктайғақ кезінде жолда аса мұқият болуға тағы да шақырды.