Маңғыстау облысында Бекет ата мешітіне жолға шыққан үш адам жоғалып кеткен. Бұл туралы олардың туыстары әлеуметтік желіде жариялады, – деп хабарлайды aqshamnews.kz тілшісі.
Ақтау қалалық полиция басқармасының криминалдық полиция бөлімі үш адамға іздеу жариялап, бағдар таратты. Олар Бекет ата мешіті бағытына барғаннан кейін байланысқа шықпай қалған.
"2026 жылғы 2 шілдеде сағат 16:15 шамасында Жұбатқанов Қанатбек Кеңесбайұлы, Бисенова Ақмарал Раймбердіқызы және Бисенова Мархабат Раймбердіқызы мемлекеттік нөмірі 010 FZA 12 Great Wall көлігімен Бекет ата мешіті бағытына жолға шыққан", - делінген хабарламада.
Құқық қорғау органдарының мәліметінше, туысқандары жоғалғандармен кейінгі рет 2 шілдеде байланысқа шыққан. Олар Бекет ата мешіті аумағынан WhatsApp арқылы видео жіберген. Содан кейін байланысқа шықпаған. Қазір олардың қайда екені белгісіз.
Қазір полиция қызметкерлері жедел-іздестіру шараларын жүргізіп жатыр. Полицияның жеке құрамы, учаскелік инспекторлар және қоғам өкілдері жоғалған азаматтарды іздеуге жұмылдырылған. Олардың болуы мүмкін жерлері тексеріліп жатыр.
Полиция өңір тұрғындарынан мұқият болуды сұрайды. Іздеудегі адамдардың жүрген жері туралы қандай да бір ақпарат білсеңіз немесе тергеуге көмектесуі мүмкін дерек болса, дереу Ақтау қалалық полиция басқармасының криминалдық полиция бөліміне хабарласу қажет.
Байланыс телефондары: 102, 8 (775) 421-94-96, 8 (775) 509-87-97.