Көкке оранған Алматының кейбір ағашы халықаралық достықтың жемісі екенін білесіз бе? Әсіресе сакураларға тоқталсақ, бұл - жапон халқы мен алматылықтардың арасындағы дипломатияның айғағы. Қалада мұндай қанша ағаш бар? Оны Алматыға кім сыйлады? Толығырақ aqshamnews.kz материалында.
Есентай жағасындағы 100 сакура
2019 жылы Есентай өзені бойында сакуралар жайқалып шыға келді. Жапонияның Tokyo Rope International компаниясы Алматыға ерекше сый жасады. Сол жылы компания президенті Сато Казунори бастаған делегация өз қолымен 100 сакура көшетін отырғызды.
Онкология институтындағы сакура бағы
2022 жылы ҚазОРҒЗИ аумағында да сакуралар егілді. Бұл жолы биофармацевтикалық алпауыт – Takeda Kazakhstan демеушілік көрсетті. Сакуралармен қатар 50-ге жуық бұталар егілді: олардың ішінде хост гүлі, арша, вангут спиреясы, қызыл бөріқарақат, раушан, гортензия сияқты сәндік өсімдіктер бар.
Сәтбаев сакурасы
Биыл Ғылым күнінде Ұлттық ғылым академиясының ауласында ерекше символикалық оқиға болды – «Сәтбаев сакурасы» қайта отырғызылды. Бұл ағаштар 1960-жылдары академик Қаныш Сәтбаевқа жапон делегациясы сыйлаған алғашқы сакуралардың тарихи жалғасы. Жаңа отырғызылған түрлер – Kanzan мен Kiku-Shidare – ғылым мен мәдениеттің байланысын білдіретін ескерткіш.
Тұңғыш Президент саябағындағы жапон бағы
2015 жылы Тұңғыш Президент саябағында “Жапон бағы” ашылды. Мұнда сакуралармен бірге жапон үйеңкілері мен қырым қарағайлары отырғызылған. Әр элемент – мұқият таңдалған: тастар, су ағысы, өсімдіктер – бәрі жапон мәдениетінің бір бөлшегі іспетті.
Айта кетейік, алматылықтар да қаланы көгалдандыруға белсенді қатысады. Биылғы көктемгі сенбілікте Алматыда 10 мың түп ағаш отырғызылды. Есентай өзенінің бойына алма мен алмұрттың көпжылдық көшеттері егілді.