Олар үшін «БИЛ», «Дарын» сияқты мектептерге квота бөлінеді.
Оқу-ағарту министрі Асхат Аймағамбетов әлеуметтік осал отбасылардан шыққан балаларға мамандандырылған мектептерге түсу үшін 15 пайыз квота алуға мүмкіндік беретін бұйрыққа қол қойды, деп хабарлайды Almaty-akshamy.kz
«Енді осындай отбасылардан шыққан 1500-ға дейін бала жаңа квота бойынша «БИЛ», «Дарын» және т.б. мектептерге оқуға түсе алады. Бүгінгі таңда жаңа бұйрықтың арқасында әлеуметтік осал отбасылардан шыққан балалар осындай мамандандырылған мектептерге қабылданды», - деп жазды Аймағамбетов Facebook-тегі жеке парақшасында.
Министрдің айтуынша, тұрмысы төмен болғандықтан қосымша білім алуға мүмкіндігі жоқ балалар үшін осындай мектептерде оқуға мүмкіндік беру олардың болашақтағы жетістіктеріне оң әсер етеді.
Ол бұған дейін Ұлттық қоғамдық сенім кеңесінің ұсыныстары аясында колледждер мен жоғары оқу орындарына түсуге осыған ұқсас квоталар енгізілгенін атап өтті. Сол шешімнің арқасында мыңдаған балалар оқуға түсті.
«Біз жас дарындарға да, өзін әлі көрсете алмағандарға да тең жағдай жасауымыз керек. Ал ұстаздарымыз озат балаларға да, оқуда үлгерімі нашар болса да, қолдау мен жылы сөзге мұқтаж балаларға да мейіріммен қарайды деп үміттенемін», деп жазды Асхат Аймағамбетов.