Алматы қаласының Алатау ауданындағы Оқушылардың инновациялық шығармашылық орталығында Президент кеңесшісі Мәлік Отарбаев Алматы білім басқармасы мен педагогтар қауымымен кездесу өткізді.
Кездесу барысында Мемлекет басшысының «Әділетті Қазақстан: заң және тәртіп, экономикалық өсу, қоғамдық оптимизм» атты Жолдауы талқыланды. Жолдауда айтылған білім беру саласының одан әрі дамуы және мамандар даярлау мәселелері басты назарда болды.
– Білім – қоғам мен экономиканың сәтті дамуының негізі. Сапалы білімнің маңыздылығын асыра бағалау қиын. Технологиялардың жылдам өзгеруі мен жаһандану жағдайында біз жас мамандарға тек теориялық білім беріп қана қоймай, оларды кәсіби өмірдің шынайы сынақтарына дайындауымыз қажет. Жұмыс нарығына кірген жастар өзімен бірге жаңа идеялар мен инновациялық тәсілдерді әкеледі, сондықтан олардың таланттарын дамыту және жүзеге асыру үшін жағдай жасау маңызды. Алынған білімді іс жүзінде қолдану, сыни және шығармашылық ойлау қабілеттерін дамыту – заманауи білімнің ажырамас бөлігі, – деп атап өтті Мәлік Отарбаев.
Сондай-ақ, кітап оқудың маңыздылығы мен оның білім беру процесіндегі негізгі рөл атқаратыны атап өтілді. Бұл тек жинақталған тәжірибені жеткізіп қана қоймай, әлемді терең түсінуге және талдау қабілетін дамытуға мүмкіндік береді. Сонымен қатар, баспасөзді дамыту қажеттілігі де айтылды, себебі баспа басылымдары ақпараттың түрлі көздеріне кең қолжетімділік беріп, оқиғаларды жақсы түсінуге ықпал етеді.
