Астанада көліктерге дымқыл майлық пен хат салынған қалташалар іліп кететіндер көбейген.
stankznews-тің жазуынша, елордалықтар мұны көшеде жиі кездестіретінін айтады.
Олардың айтуынша, мұндай "сыйлықтарды" көбіне әйнекке немесе есік тұтқаларына іледі. Тіпті онда: "Көмектесіңдерші, балам ауырып жатыр, шамаларың келгенше ақша аударыңдаршы" деген жазу бар. Карта нөмірі де жазылған.
Кей тұрғындар мұны ақша табудың жолы деп санайтынын айтты. Майлықтар арзан, соған қарамастан біреу-міреу 1000-2000 теңге аударып қалады деген есеп болса керек.
Полиция мұндай жағдайлар жиілеп кеткенін растады. Осындай жағдайлардың бірі бойынша жүргізілген тергеу аясында жазбада көрсетілген нөмір Тараз тұрғынының атына тіркелгені анықталған. Қазір тергеу жүріп жатыр екен.