Қала тазалығын сақтауға арналған шараға қоғам қайраткерлері, өнер және мәдениет өкілдері, еріктілер мен қала тұрғындары белсенді қатысуда.
Бүгін «Достық саябағында» өткен экологиялық акцияға әр саланың белгілі тұлғалары жиналды. Бұл іс-шара «Таза Қазақстан» республикалық эко-акциясының бастамасымен «Алматы – біздің ортақ үйіміз» науқаны аясында ұйымдастырылды.
Акцияның басты мақсаты – қоршаған ортаны қорғау, көліктерден, өндіріс орындарынан және тұрмыстық қалдықтардан келетін зиянды әсерді азайту, сондай-ақ қала тұрғындарын экологиялық мәдениетке баулу.
Экологиялық шараға Мемлекеттік тілді дамыту қорының атқарушы директоры, қоғам қайраткері Бижомарт Қапалбек те қатысып, өз пікірін білдірді:
– Бұл бастама өте құптарлық. Бірақ осындай акциялар науқаншылдық сипатында қалып қоймауы керек. Қоршаған ортаның тазалығын сақтау – күнделікті дағдымызға айналуы тиіс. Мысалы, жапон халқы жүрген жерін әрдайым таза ұстайды. Біз де осындай мәдениетті қалыптастыруымыз қажет. Сонымен қатар, қаладағы ескі ағаштарды жаңартып, жасыл желек көлемін арттыру маңызды. Әсіресе, қысы-жазы оттегі бөліп тұратын арша, шырша секілді ағаштар отырғызылса, тіпті жақсы болар еді, – деді ол.
Ортақ иглікті мақсат еткен шараға өнер өкілдері де салымын қосуда.
– Қазақ халқының ұлттық дәстүріне сай, көктем тазалықтан басталады. Көпшілік болып тазалыққа үлес қосуға ықылас таныттық. Әркім айналасынан бастаса, қала келбеті де өзгереді. Ұқыпты болу – мәдениеттіліктің белгісі, – деді әнші Біржан Хасанғалиев.
Экологиялық бастамалар қала тұрғындарының қоршаған ортаға деген жауапкершілігін арттыруға үлкен үлес қосары сөзсіз.