LOT Polish Airlines Алматы туралы арнайы борттық журнал шығарды, – деп хабарлайды aqshamnews.kz тілшісі.
Алматы Еуропаның туристік нарығында насихатталатын жаңа ақпараттық алаңға ие болды. LOT Polish Airlines әуе компаниясы қалаға арналған арнайы борттық журнал шығарды.
Басылым беттерінде Алматының туристік әлеуеті, көрікті орындары, табиғи аймақтары мен қаланың бірегей келбеті кеңінен таныстырылған. Журнал Алматыға ұшатын рейстерде ғана емес, Польша ішіндегі және әуе компаниясының Еуропа елдеріне қатынайтын халықаралық бағыттарында да таратылады.
Жоба Алматы қаласы Туризм басқармасы мен LOT Polish Airlines әуе компаниясының ынтымақтастығы аясында жүзеге асып, шетелдік саяхатшылар арасында қаланың танымалдылығын арттыруға бағытталған.
Алматының туризм саласы өкілдері Польшаның жетекші туроператорларымен кездесу де өткізді. Тараптар өзара әріптестік мүмкіндіктерін талқылап, байланыс орнатып, Қазақстан мен Польша арасындағы туристер санын арттыруға қатысты жоспарларды айқындады.
Еуропадағы ірі әуе компанияларының бірі шығаратын борттық журналда Алматы туралы ақпараттың жариялануы қаланы халықаралық аудиторияға кеңінен танытып, екі ел арасындағы туристік әрі іскерлік байланыстың нығаюына серпін береді.
Еске сала кетейік, 2026 жылғы 31 мамырда LOT Polish Airlines әуе компаниясы Алматы мен Варшава арасында тікелей әуе рейстерін ашты. Рейс аптасына төрт рет орындалады.