Лагерьлердің жазғы маусымға дайындығы бақылауда.
Балалардың жазғы демалысын ұйымдастыру бойынша Жол карталары әзірленді, деп хабарлайды aqshamnews.kz
Денсаулық сақтау министрлігінің Санитариялық-эпидемиологиялық бақылау комитетінің мәліметінше, биылғы жылы балаларды сауықтыру ұйымдарын (лагерь) маусымға уақытылы дайындау мақсатында Комитеттің аумақтық бөлімшелері әкімдікпен бірлесіп, балалардың жазғы демалысын ұйымдастыру бойынша Жол карталарын әзірлеп бекітті.
Жол карталарын іске асыру шеңберінде:
- балалар демалысы объектілерінің санитарлық-техникалық жай-күйін бағалау жөніндегі ведомствоаралық комиссиялардың жұмысын ұйымдастыру;
- лагерь қызметкерлерімен оқыту және түсіндіру іс-шараларын өткізу, сондай-ақ дайындықтан бастап ауысым аяқталғанға дейінгі барлық кезеңдерде санитарлық-эпидемиологиялық талаптардың орындалуын бақылау;
- балалардың тамақтану, сумен жабдықтау, медициналық қызмет көрсету және тұру жағдайларының сапасын бақылау көзделуде.
Бүгінде консультациялық көмек көрсету үшін әр лагерьге санитарлық-эпидемиологиялық қызмет мамандары бекітілді, олар 191 лагерь өкілдеріне кеңес берді.
Жол карталарын іске асыру бойынша мониторинг Комитеттің бақылауында.
Қазіргі уақытта Комитеттің аумақтық бөлімшелерінің атына санитарлық-эпидемиологиялық қорытынды (СЭҚ) алуға 29 өтініш келіп түсті, оның 8-і СЭҚ алды, 17-сі қаралуда, 4-не дәлелді бас тарту берілді.
Дәлелді бас тартудың негізгі себебі – құжаттардың толық емес пакетін ұсыну, атап айтқанда жарықтандыру хаттамаларының, микроклиматтың, суды вирусологиялық зерттеудің және объектінің техникалық паспортының болмауы.
Апта сайын жаңартылатын СЭҚ алған лагерьлер тізімімен Комитеттің сайтында танысуға болады.
Сонымен қатар Комитет жедел желі 8-7172-74-27-05 ұйымдастырды, онда лагерьлердің жұмысында қандай да бір бұзушылықтар анықталған кезде шағымдануға болады.