Психолог күзгі күйзеліске тән бірнеше белгіні атады
Күзде күннің қысқаруы, D дәруменінің жетіспеушілігі және ұзақ күтілетін демалысқа дейінгі уақыттың ұзақтығы адамның эмоционалды жағдайына кері әсер етіп, маусымдық күйзеліске әкелуі мүмкін, - деп хабарлайды Aqshamnews.kz тілшісі.
Бұл туралы психолог Ольга Романив Life.ru сайтына берген сұхбатында айтты.
Маманның айтуынша, күзгі депрессияның негізгі белгілерінің бірі - зейін қоюдың қиындауы мен ұйқышылдықтың артуы. Себебі күз мезгілінде адамның табиғи биологиялық ырғақтары бұзылып, мелатонин (ұйқы гормоны) ерте бөліне бастайды. Соның салдарынан тіпті 8 сағат ұйықтаған адамның өзі шаршаңқы күйде оянады.
Күйзелістің басқа да белгілері бар. Олар:
- Тағамға деген қатынастың өзгеруі – тәбеттің төмендеуі немесе керісінше, артық тамақтану;
- Хоббиге, күнделікті қуаныш сыйлайтын істерден суып кету;
- Туыстармен және достармен араласуға деген құлшыныстың жойылуы.
Ольга Романив күзгі күйзелісті жеңу үшін мынадай пайдалы дағдыларды ұстануға кеңес береді:
Кешкі 23:00-ге дейін ұйықтап, кемінде 8 сағат үздіксіз ұйықтау;
Күн сайын таза ауада кемінде 1 сағат серуендеу;
Көкөніс, жеміс-жидек, жасыл шөптер мен ашытылған сүт өнімдерін тұтынуды арттыру;
Жұмыс орнында және үйде табиғи және жасанды жарықтың жеткілікті болуын қадағалау;
Жақын адамдармен қарым-қатынасты үзбеу, тіпті, сөйлесуге көңіл соқпаса да, араласуға тырысу.
Маман күзгі күйзелісті уақытында байқап, алдын алу – психикалық денсаулықты сақтаудың маңызды қадамы екенін ескертеді.