Алматы қалалық кардиохирургия орталығы тарихында алғаш рет жүрек трансплантациясы жасалды, деп хабарлайды Aqshamnews.kz тілшісі.
Науқас – 34 жастағы қала тұрғыны. Операциядан кейін үйіне шыққан жігіт өзінің жүрек проблемаларының энергетикалық сусындарды көп ішуінен басталғанын ашық айтты:
«Бастапқыда күніне 1-2 энергетик ішетінмін, кейін әртүрлі түрінен күніне 10 бөтелкеге дейін жетті. Бұл менің қателігім болды. Дәрігерлеріме алғысым шексіз, олар менің өмірімді сақтап қалды», – деді науқас.
Денсаулық сақтау министрлігінің мәліметіне қарағанда, науқас донорлық кезекте тұрған. Операция бес сағатқа созылды және сәтті аяқталды.
«Науқасқа терминалды созылмалы жүрек жеткіліксіздігі диагнозы қойылған. Жүрек трансплантациясын Алматы қалалық кардиологиялық орталығының мультидисциплинарлық командасы University Medical Center (Астана) мамандарымен бірлесе отырып орындады. Операцияны ҚКО директоры Ермағамбет Қуатбаев пен UMC басқарма төрағасы, профессор Юрий Владимирович Пя жетекшілік етті. UMC командасы әріптестерін қолдау үшін Алматыға жедел келді», – деп хабарлады ДСМ баспасөз қызметі.