Елімізде 2035 жылы жалпы көлемі 26,5 ГВт электр энергиясы өндіріледі деп болжануда. Соның 9%-ын, яки 2400 МВт-ты атом электр станциясы жабады деп жоспарланып отыр. Сондай-ақ жаңартылатын энергия көздерінің үлесі қазіргі 6%-дан 36%-ға жетеді деп күтілуде. Ал көмір мен газ генерациясы қазіргі 70%-дан 42%-ға, яки тең жартысына төмендейді.
Бұл шаралар ауаға тарайтын зиянды түтіндердің азаюына әкеледі.
Бүгінде Қазақстандағы парниктік газдардың 81,6%-ы көмірқышқыл газынан, 12,4%-ы метаннан, 5,6%-ы азот шала тотығынан тұрады. 1 ГВт электр энергиясын өндіру үшін 7-120 мың тонна күкірт тотығы, 2-20 мың тонна азот тотығы, 3-7 миллион тонна көмірқышқыл газы бөлінсе, 700-1500 тонна майда күл және 300 мың тоннадан астам ірі күл қалдық ретінде қалады. Ірі күл құрамында 400 тоннаға жуық улы металдар бар. Ал АЭС арқылы осынша көлемдегі электр энергиясын өндіргенде, бұл қалдықтардың ешқайсысы болмайды.
Бастапқыда елімізде АЭС салуға 3 жер таңдалғанын білесіздер. Олар – Ақтау қаласы, Курчатов қаласы және Үлкен елді мекені. МАГАТЭ мамандары энергетикалық торап болып саналатын Үлкен ауылын құптап отыр. Қазақстан ІІІ және ІІІ+ буын реакторларын таңдады. Олар 8 баллдық жер сілкінісіне төтеп бере алады. Балқаш көлінің маңында болатын жер сілкіністері әдетте 6 баллдан аспайды.
Жаңа технологиялардың артықшылығы осында. 9-10 баллдық жер сілкінісіне шыдайтын технологиялар да бар, бірақ ол қаржыға байланысты.