Ол – атақты «Қан мен тер» трилогиясының авторы Әбдіжәміл Нұрпейісов.
Бүгін қазақтың қабырғалы қаламгері, жазушы, аудармашы Әбдіжәміл Нұрпейісов 97 жасқа толды, деп хабарлайды Almaty-akshamy.kz
Әбдіжәміл Нұрпейісов – 1924 жылы 22 қазанда Қызылорда облысы Арал ауданы Үшкөң ауылында дүниеге келген. Қазақстанның Халық жазушысы. ХХ ғасырдағы қазақ әдебиетіне зор үлес қосқан жазушы, қоғам қайраткері.
1941-1945 жылдардағы II Дүниежүзілік соғыс ардагері, Оңтүстік және Прибалтика майданында, Луганск түбінде миномёт ротасында саяси қызметкер, кейін штабист ретінде Балтық маңында Курляндия плацдармындағы шайқастарға қатысқан.
1946 жылы желтоқсанда Әбдіжәміл әскер қатарында жүріп «Курляндия» романын жазуға кіріскен. Оны бітіріп баспаға берген соң, бір жыл Қазақ мемлекеттік университетінде оқыды.
1954 жылы Мәскеудегі М.Горький атындағы Әдебиет институтына түсіп, оны 1956 жылы бітірді. Тырнақалды кітабы үшін Жамбыл атындағы республикалық сыйлықтың иегері атанды.
1962-1964 жылдары Қазақстан Жазушылар одағының органы – «Жұлдыз» журналының бас редакторы да болып қызмет істейді, Қазақ ССР-і Жоғарғы Кеңесінің депутаты да болды.
Қаламгер А.П.Чеховтің, А.М.Горькийдің, Назым Хикметтің, испан жазушысы А.Кэсонің шығармаларын қазақ тіліне аударған.
«Қан мен тер» трилогиясы, «Соңғы парыз» дилогиясы - Ә.Нұрпейісовтің ғана емес, күллі қазақ әдебиетінің табысы. Жазушының ерен еңбегі елдің, мемлекеттің жоғары бағасына ие болды. Жазушы ретінде «Еңбек Қызыл Ту», «Құрмет белгісі», Қазақстан мемлекетінің «Отан» орденімен марапатталған.
2019 жылы жазушы Алматы қаласының Құрметті азаматы атанды.