Марқұм Ақнәр Гүлстанның анасы әділдікке қол жеткізе алмай жүргенін айтып, президент Тоқаевқа үндеу жолдады.
“Қызымның қайтыс болғанына бүгін тұп-тура бес жүз күн болды. Осы бес жүз күннен бері қарай әлі әділдікке қол жеткізе алмай келе жатырмын. Іс әлі шешілген жоқ. Үздіксіз шағымдануымның нәтижесінде іс Ұлттық қауіпсіздік комитетінің тергеуіне берілді. Әлі де толыққанды шешім шыққан жоқ. Күдіктілер ұсталған жоқ. Менің жалғыз қызымды өлтіргендер жазаланбай жатыр. Бұл істі жабуға болмайды. Біздің Қазақстан Республикасында заң бар. Ақордада айтылған әр тапсырма орындалуға тиіс. Мемлекет басшысы араласып, әділ шешім шығаруға көмектеседі деп әлі де үміттенемін”, - деді ол.
Сондай-ақ, Ақнәрдің анасы Ұлттық қауіпсіздік комитетінің басшысы Ермек Сағымбаев, бас прокурор Берік Асыловқа да үндеу жасады.
Ақнәрдің қазасы туралы не белгілі?
2024 жылғы шілдеде алматылық Ақнәр Гүлстан көпқабатты үйдің терезесінен құлап, ауыр жарақаттан қаза тапты. Марқұмның туыстары оның өзіне қол жұмсағанына сенбейді және оны таныстары өлтіргенін айтты.
Марқұмның анасы Гүлстан Қамиттің айтуынша, қызы құлар алдында азапталған. Сараптама нәтижесі бойынша Ақнәрдің денесінде жарақат іздері болған, тістелген және тырналған жаралар байқалған. Пәтерден сынған тырнақтар мен жұлынған шаштар табылған. Әйелдің сөзінше, қызын екі курстасы азаптап, кейін терезеден лақтырып жіберген.
Қайтыс болған қыздың анасы ұсынған кадрлар