Еңбек адамы
Медицина саласында өмірді құтқару мен денсаулықты сақтау – күнделікті күрделі де қасиетті міндет. Алматы қалалық орталық клиникалық ауруханасының офтальмология бөлімінің меңгерушісі Гүлзат Әбдірайымова үшін бұл тек жұмыс қана емес, нағыз өмірлік миссия.
Құтқарылған көру қабілеті
Жақында ауруханаға ауыр жарақатпен 69 жастағы ер адам жеткізілді. Науқас үстелдің бұрышына соқтығысып, көру органына үлкен зақым келтірген. Диагноз өте күрделі болды: көз алмасының ауыр контузиясы, ақ қабықтың жыртылуы, ішкі қабаттардың түсіп кетуі, жарақаттан кейінгі афакия, гемофтальм және тор қабықтың ажырауы. Бұл жағдай науқас үшін толық соқырлық қаупін төндірді.
Дегенмен Гүлзат Әбдірайымова бастаған офтальмологтар командасы өз шеберлігін көрсетіп, көз жанарын сақтап қалды. Бірінші кезеңде көздің жарақаты хирургиялық өңдеуден өтті. Кейін заманауи әдістерді қолдана отырып, витрэктомия, лазерлік коагуляция және бірегей иридохрусталик диафрагмасын имплантациялау операциясы сәтті жүзеге асырылды. Пациент үшін жасанды радужка мен линза арнайы дайындалды.
Кәсіби шеберлік пен жанашырлық
Науқастың сөзінше, операция оның өмірін түбегейлі өзгертті:
"Диагноз мен үшін ауыр үкім сияқты естілді. Бірақ Гүлзат Әбдірайымова бастаған дәрігерлердің кәсібилігі мен адамгершілігінің арқасында көру қабілетім қайта оралды. Мен оларға өмір бойы ризамын."
Бұл тек бір оқиға ғана емес. Гүлзат Әбдірайымова мен оның командасы күн сайын жүздеген пациенттің денсаулығын жақсартып, олардың болашағына үміт сыйлайды.
Заманауи медицина мен жаңа технологиялар
Операция міндетті әлеуметтік медициналық сақтандыру (МӘМС) жүйесі аясында өткізілді. Бұл жоғары технологиялық медициналық көмекке қолжетімділікті арттырып, көптеген науқасқа көмек көрсетуге мүмкіндік берді. Гүлзат Әбдірайымова осы жүйе аясында заманауи медицинаның жаңа мүмкіндіктерін қолдана отырып, өзінің кәсіби қабілетін көрсетіп келеді.
Мамандыққа адалдық
Гүлзат Әбдірайымова – нағыз өз ісінің шебері. Оның кәсібилігі мен жанашырлығы мыңдаған адамның алғысына ие. Ол тек білікті маман ғана емес, әр науқасқа жүрек жылуын сыйлай алатын жанашыр дәрігер.
Гүлзат Әбдірайымова – адамдарға көру қабілетін ғана емес, өмірге деген сенімділік пен болашаққа үміт сыйлайтын маман.