Мемлекеттік индустрия және құрылыс министрлігі су жабдықтау мен су бұру қызметтерінің көлемін есептеу әдістемесін өзгертетін бұйрыққа қол қойды. Ведомствоның мәлімдеуінше, жаңа әдістеме қазақстандықтарға еш қолайсыздық тудырмайды, деп хабарлайды Аqshamnews.kz тілшісі Tengrinews.kz-ке сілтеме жасап.
Жаңа ереже 1 қарашадан бастап күшіне енеді. Министрлік азаматтар арасында туындаған "көршілер үшін жалпы есептегіш бойынша төлейміз бе?" деген күмәнді сұрақтарға түсініктеме берді.
"Бұл қауіптер орынсыз. Қабылданған әдістеме жаңа төлем түрлерін енгізбейді және төлем мөлшерін ұлғайтпайды", — делінген ведомство хабарламасында.
Министрліктің түсіндіруінше, құжаттың мақсаты - су арналарымен берілетін және бұрылатын су көлемін анықтаудың бірыңғай қағидаларын бекіту. Бұрынғыдай төлем тұтынушы желісі мен су арнасы желісінің жауапкершілік шекарасында орнатылған есептегіш құралдарының көрсеткіші бойынша есептеледі. Есептегіш жоқ жерде жергілікті атқарушы органдар (әкімдіктер) бекіткен тұтыну нормалары қолданылады.
Көппәтерлі үйлер үшін де тәртіп өзгермейді: егер үйде жалпыүйлік есептегіш болса, ал кейбір пәтерлерде жеке есептегіштер орнатылмаған жағдайда, жалпыүйлік және жеке есептегіштер арасындағы айырма кондоминиум қатысушылары арасында пропорционалды бөлінеді. Мұндай тәртіп бұған дейін де қолданылып келген, енді ол түсінбеушілікті болдырмау үшін жаңартылған әдістемеде нақты бекітілді.
Комитет төрағасының орынбасары Нұрсұлтан Керемкұловтың айтуынша, құжаттың басты мақсаты - жүйені айқын ету:
"Әдістеме төлем қағидасын өзгертпейді. Есептегіш бар жерде адам тек өз тұтынған суы үшін төлейді, есептегіш жоқ жерде бекітілген норма бойынша. Жалпыүйлік пен жеке есептегіш арасындағы айырма бұл үйдің ортақ қажеттіліктері, біреудің қателігі не айыппұлы емес. Ешқандай жасырын есептеулер болмайды. Мұндай айырманы бөлу тәртібі бұрыннан бар", - деді ол.
Осылайша, әдістеме пәтер иелері үшін ештеңені өзгертпейді: тек қолданыстағы тәжірибені заңдық тұрғыда нақтылап, елдің барлық өңірі үшін бірыңғай әрі түсінікті етеді. Ведомство суға төлем өспейтінін тағы да растады.