Екеуі Қазақстанның қос ішегі іспетті
«Біреуі – дәстүр де, екіншісі – заң. Екеуі Қазақстанның болмысын білдіріп тұр». Осындай тағылымды ұранмен Қазақстанның еңбек сіңірген қайраткері, PhD докторы, Құрманғазы атындағы Қазақ ұлттық консерваториясының «Домбыра» кафедрасының доценті Ержан Жәмеңкеев Өңірлік коммуникациялар қызметінде Қазақстан Республикасының жаңартылған конституциясының күшіне енуіне арнап күй тартты.
Бұл музыкалық туынды негізгі заңның басты идеясын – халық бірлігін, ұрпақтар сабақтастық пен мемлекеттің үйлесімді дамуын көркем түрде бейнелейді. Күйшінің айтуынша, әртүрлі нәрсе болғанымен, конституция мен домбыра екеуінің миссиясы бір. Екеуі де халықтың үнін жеткізеді екен.
«Конституция – халықтың көзі, құлағы һәм үні болса, қазақтың қасиетті домбырасы – оның рухани коды. Домбыраның қос ішегі Қазақстанның қос тірегін бейнелейді: біріншісі – ата дәстүріміз, екіншісі – заң. Екеуі үндессе берекеміз артып, жарқын болашақ қалыптасады», – дейді Ержан Жәмеңкеев.
Ол ұлттық мұраға қалай қарасақ, конституцияға да солай қарауымыз керек дегенді айтты. Себебі бай дәстүр мен заң үстемдігі үйлесім тапқанда ғана қуатты, әділетті әрі заман көшіне ілескен мықты мемлекет қалыптасады.
Сөз соңында музыкант Қазақстанға одан әрі өркендей беруді тіледі.