Қазіргі таңда Қазақстанда кондиционер орнатуға тыйым салатын заң жоқ, деп хабарлайды aqshamnews.kz
Krisha мәліметінше, кейбір дизайн-кодтар ғимараттардың алдыңғы бетіне кондиционер қоймауды, ортақ декоративті қораптарды пайдалануды, сымдар мен құбырларды көзден таса жерде жүргізуді ұсынады. Бірақ бұл – міндетті талап емес. Кондиционер орнатуға рұқсат тек тарихи ғимараттар үшін қажет және бұл талап, ең алдымен, жаңа үйлер мен құрылыс компанияларына қатысты. Қарапайым тұрғындарға қатысы жоқ.
Кондиционер орнату үшін көршілердің келісімі талап етілмейді, өйткені бұл қайта жоспарлау болып саналмайды және ортақ мүлікке әсер етпейді.
Қоғамда бұл мәселеге қатысты түрлі тыйымдар туралы әңгімелер айтылып жүр. Олар жаңа Сәулет-құрылыс кодексін талқылаумен байланысты. Алайда ол құжатта кондиционерге нақты тыйым салу туралы бап жоқ. Әрбір пәтер иесі егер өзгелерге зиян келтірмесе, өз қабырғасына кондиционер орнатуға құқылы.
– Кондиционер орнату – бұл қайта жоспарлау да, қайта жаңарту да емес. Ол инженерлік желілерге және ортақ мүлікке әсер етпейді. Кондиционер өз қабырғаңа орнатылады – болды. Әкімшілік құқық бұзушылықтар кодексінде кондиционерге қатысты бап жоқ. Ал 505-бап мүлде басқа нәрсеге – қоқыс, инфрақұрылымды бүлдіру, ағаш кесуге арналған. Фасадтар оған кірмейді, – деп түсіндірді заңгер Аркадий Рубцов.
Айта кетейік, бұған дейін кейбір бұқаралық ақпарат құралдары мен әлеуметтік желілерде кондиционер орнатқаны үшін қазақстандықтарға 78 мың теңге айыппұл салынады деген ақпарат тараған болатын. Бұл мәлімет шындыққа жанаспайды.