Қарағандыда бизнес өкілдерінің сұрақтарына жауап бере отырып, Мәжіліс депутаты Азат Перуашев АЭС жобасы жаңа жұмыс орындарын ашып, инженерлік инфрақұрылымның дамуына серпін беретінін мәлімдеді.
Атом энергетикасы ұзақ мерзімді перспективада электр энергиясының тұрақты бағасын қамтамасыз етеді, деп жазады inkaraganda.kz.
Бұл, әсіресе, Қазақстан экономикасының бәсекеге қабілеттілігін арттыру және өнеркәсіптің дамуы үшін маңызды.
«Қазіргі уақытта еуропалық елдер «көміртек ізінің» проблемасына қатты алаңдауда, олар көмірмен жұмыс істейтін электр станцияларын біртіндеп жауып жатыр. Ал көмір станцияларынан өндірілген энергиямен шығарылатын тауарларға қосымша салықтар салынады. Бұл отандық өндірушілерге үлкен шектеулер қояды, олардың экспорттық өнімдері бәсекеге қабілетсіз болып, кірістері азаяды», – деп атап өтті Перуашев.
Оның пікірінше, қазақстандықтар әлемдік энергетиканың озық технологияларын қолдануы керек және заманауи ғылыми-технологиялық тәжірибелерді меңгеруі тиіс.
«Қазақстан өркениеттен артта қалмауы тиіс. Біз атом электр станциясын сала алмаймыз немесе білікті мамандар жоқ деген пікірмен мүлдем келіспеймін. Қазақстанда мыңдаған студенттер, оның ішінде шетелде де, атом энергетикасына қатысты мамандықтар бойынша білім алуда. Олар Өскемендегі Үлбі металлургиялық зауытында, Қытайға экспортталатын ядролық отын өндірілетін жерде, Алматыдағы Ядролық физика институтында, сондай-ақ Курчатовтағы Ұлттық ядролық орталықта тәжірибеден өтуде», – деп түсіндірді депутат.