Ришад Галиев — Алматы құрылыс-техникалық колледжінің түлегі, оның еңбек жолы жұмысшы мамандықтары туралы стереотиптерді бұзып қана қоймай, маңдай термен адал еңбек табуға ынталандырады. Бүгінде ол елдегі ең жоғары жалақы алатын жас мамандардың біріне айналды. Ришад айына 800 мың теңге табыс табады. Оның еңбек жолы — мақсатқа жетудегі жігерлі табандылықтың және өз ісіне сенудің жарқын мысалы бола алады, деп хабарлайды aqshamnews.kz Оқу-ағарту министрлігіне сілтеме жасап.
Ришад — WorldSkills Kazakhstan республикалық кәсіби шеберлік чемпионатының бірнеше дүркін жүлдегері. 2022 жылы ол әлемдік чемпионатқа еліміздің атынан «Сантехника және жылыту» құзіреттілігі бойынша қатысты. Колледждің екінші курсында Ришад колледждің жетекші компаниялармен серіктестігі және дуальды оқыту жүйесі аясында құрылыс алаңдарында тағылымдамадан өте бастады. Осы тәжірибе практикалық дағдылар мен мамандықты іс жүзінде игеруге мүмкіндік берді. Жақын арада ол GROHE халықаралық компаниясынан жұмысқа орналасуға ұсыныс алды.
Ол мамандықты әуел баста ата-анасының кеңесі бойынша таңдады, кейін бұл мамандық оның жүрек қалауына айналған.
«Мен өзім оқыған колледжге және ұстаздарыма алғыс айтамын — олар маған тек білім ғана беріп қоймай, маман ретінде өзіме деген сенімділікті арттырды. Колледждің компаниямен ынтымақтастығының арқасында мен еңбек тәжірибемді ерте бастауға мүмкіндік алдым және бұл менің өсу нүктеме айналды. Мен Жұмысшы мамандықтарының жылы үшін ел Президентіне ерекше ризамын. Бұл маңызды қадам, ол бізге жұмысшы мамандығының иесі болу — құрметті, заманауи және сұранысқа ие екендігін дәлелдейді. Жұмысшы мамандықтары — бұл біздің өз қолымызбен қалап жатқан болашағымыздың іргетасы», — дейді колледж түлегі.
Қазіргі таңда Алматы құрылыс-техникалық колледжінде 1200-ден астам студент оқиды. Олардың 90%-ға жуығы алған мамандықтары бойынша жұмысқа орналасады. Дуальды оқыту және жетекші кәсіпорындармен белсенді ынтымақтастықтың арқасында студенттер 2-3-курстарда ақылы тәжірибеден өтуге мүмкіндік алады. Бұл кезеңде оқушылардың орташа табысы айына 300 мыңнан 500 мың теңге аралығын құрайды.