2025 жылғы 24 қаңтарда Солтүстік Қазақстан облысының прокуратурасы көлікті 5 минуттан артық қыздырғаны үшін салынған әкімшілік айыппұлды жойды, деп хабарлайды aqshamnews.kz Zakon.kz. сілтеме жасап.
СҚО прокуратурасының мәліметінше, әкімшілік құқық бұзушылықтар туралы ҚР Кодексінің талаптарын өрескел бұзу фактілері анықталған.
«Петропавл қалалық полиция басқармасының қызметкері қала тұрғынына көлік тұрағында көлікті 5 минуттан артық қыздыруға байланысты әкімшілік құқық бұзушылық туралы хаттама толтырған. Алайда хаттама толтыру барысында процессуалдық бұзушылықтарға жол беріліп, құқық бұзушының кінәсін дәлелдейтін айғақтар жиналмаған», – делінген хабарламада.
Петропавл прокурорының наразылығы негізінде полиция органдарының әрекеті заңсыз деп танылып, әкімшілік құқық бұзушылық туралы іс құқық бұзушылық құрамының болмауына байланысты тоқтатылды.