Алматыдағы «Көк-Төбе» телемұнарасындағы жарықтандыру жүйесінің жұмысын мамандар түсіндірді.
Архитектуралық нысандарда, оның ішінде «Көк-Төбе» телемұнарасында, арнайы бағдарламалық қамтамасыз етумен басқарылатын медиа қасбеттер орнатылған. Бұл туралы телемұнараның жарықтандыру жүйесіне жауапты мердігер компанияның мамандары мәлімдеді, деп хабарлайды aqshamnews.kz
Медиа қасбеттер әр 30 минут сайын сөндіріледі, сол кезде тек прожекторлармен қамтамасыз етілген фондық жарық қана жұмыс істейді. Бұл әдіс энергияны үнемдеп, телемұнараның эстетикалық көрінісін сақтап қалуға көмектеседі.
Осындай технологиялар әлемнің басқа танымал нысандарында да кеңінен қолданылады. Мысалы, Нью-Йорктегі Empire State Building ғимаратында жарықтандыру қарқындылығы мезгіл-мезгіл өзгеріп, кешке сөндіріледі. Бұл әдіс Токиодағы телемұнара мен Дубайдағы Бурдж-Халифа ғимаратында да қолданылады.
Мамандардың айтуынша, ірі сәулет нысандарын жарықтандыру жүйелері көпфункционалды және динамикалық болуы қажет. Бұл талап «Көк-Төбе» телемұнарасын жарықтандыру жобасында да ескерілген, себебі ол Алматы қаласының визит карточкасы болып саналады.
Алматы телемұнарасындағы жарықтандыру кестесі келесідей: күн сайын сағат 20:00-ден 02:00-ге дейін динамикалық жарықтандыру жұмыс істейді. Ал сағат 02:00-ден 05:00-ге дейін тек фондық режимде прожекторлық жарық қалады.
Мереке күндері сағат 21:00-ден 02:00-ге дейін мультимедиялық мерекелік бейнероликтер көрсетіледі.