Мемлекеттік қызметтер көрсету сапасын арттырудың маңызды құралдарының бірі олардың көрсетілуін бақылау болып табылады. Бұл механизм азаматтардың мемлекеттік органдармен өзара іс-қимылы кезінде ашықтық пен заңдылықты қамтамасыз етуде маңызды рөл атқарады.
Осыған байланысты, Алматы қаласы бойынша Мемлекеттік қызмет істері департаменті тұрақты негізде көрсетілетін қызметті берушілер тарапынан қызмет көрсету сапасының жай-күйін зерделеу бойынша жұмыс жүргізуде. Жүйелі мәселелерге де, азаматтардың нақты өтініштеріне де назар аударылады.
Мәселен, азаматы С. шағымын қарау шеңберінде Департамент жергілікті атқарушы органның мемлекеттік қызмет көрсету мерзімдерінің сақталуына тексеру жүргізді.
Қазақстан Республикасының «Мемлекеттік көрсетілетін қызметтер туралы» Заңына сәйкес көрсетілетін қызметті берушілер мемлекеттік қызмет көрсету тәртібін айқындайтын заңға тәуелді нормативтік құқықтық актілерге сәйкес мемлекеттік қызмет көрсетуге міндетті.
Алайда жоспардан тыс тексеру нәтижесінде Алматы қаласы жер қатынастары басқармасы қызметкерлерінің әрекеттерінде бұзушылық анықталды.
Департаменттің ден қою нәтижелері бойынша Алматы қаласы Медеу ауданында азамат С. жер учаскесін сату туралы Алматы қаласы әкімдігінің қаулысын беру арқылы көрсетілетін қызметті алушының бұзылған құқықтары қалпына келтірілді.
Нәтижесінде, мемлекеттік органның қызметкерлеріне қатысты бұзушылықтарға жол берген адамдарды жауапқа тарту туралы ұсыныс жіберілді.
Бұзылған құқықтар мен заңды мүдделерді қалпына келтіру мәселесі Алматы қаласы бойынша Мемлекеттік қызмет істері департаментінде ерекше бақылауда.