2024 жылғы 6 қыркүйекте ҚР Энергетика министрі Алмасадам Сәтқалиев Ш. Уәлиханов атындағы Көкшетау университетінде студенттермен кездесу өткізді. Кездесуге А. Мырзахметов университеті, М. Ғабдуллин атындағы азаматтық қорғау академиясы және Гуманитарлық-техникалық академияның студенттері қатысты.
Кездесу «Бейбіт атом» тақырыбына арналды. Министр атом энергетикасының Қазақстан үшін маңыздылығын және оның елдің тұрақты дамуы мен қауіпсіздігіне әсерін түсіндірді. Қазіргі таңда электр энергиясының 66%-ы көмір станцияларынан өндіріледі, ал жаңартылатын энергия үлесі 6%-ға жеткен. 2035 жылға қарай сұраныс 152,4 млрд кВт/сағ-қа жетеді, ал қазіргі қуаттар жеткіліксіз болмақ. Осы себепті, 26,5 ГВт жаңа қуат көздерін іске қосу қажет.
Көміртегі бейтараптығына бағытталған әлемдік үрдістер және газ генерациясын дамытудың шектеулері жағдайында, АЭС құрылысы Қазақстанның энергетикалық тәуелсіздігін қамтамасыз етудің тиімді шешімі болып табылады.
Министр студенттерге ядролық реакторлар және олардың қауіпсіздігін қамтамасыз ету туралы ақпарат беріп, сұрақтарға жауап берді. Сонымен қатар, «Көкшетау Энерго» ЖШС жұмысымен танысып, АЭС құрылысының маңыздылығын түсіндірді.